સેટેલાઇટમાં પોલીસે વર્ષ 2016માં ઝડપી પાડેલા મહેફિલકાંડમાં કોંગ્રેસના પૂર્વ પ્રદેશપ્રમુખ અર્જુન મોઢવાડિયાનો પુત્ર પાર્થ પણ મળી આવતા આખીય ઘટનામાં રાજકીય રંગ આવ્યો હતો. ત્યારબાદ આ મામલે લાંચ લેવા મામલે રેડ કરનાર મહિલા પીએસઆઇ ચંદ્રકલા જાડેજા સહિત કોન્સ્ટેબલ સામે ફરિયાદ દાખલ થઇ હતી. જોકે, ઘીના ઠામમાં ઘી તે કહેવત યથાર્થ થતી હોય તેમ આખાય કેસમાં પોલીસે યોગ્ય તપાસ કરી ન હતી.તપાસ કરનારે 41 દસ્તાવેજી પુરાવા કબજે કર્યા પરંતુ જે ઓડિયો ક્લીપ મહત્ત્વની હતી તે અંગે આરોપીની વોઇસ સ્પેક્ટ્રોગ્રાફી કરાવી જ નહીં. અવાજની ખરાઇ ન કરાવી. જેથી મહત્ત્વની ઓડિયો ક્લીપ પુરાવાના નામે શૂન્ય સાબિત થઇ છે. આ કેસમાં કોર્ટે પીએસઆઇ સહિત બે આરોપીઓને નિર્દોષ છોડી મુક્યા છે. બીજી તરફ, કોર્ટે ચુકાદાની નકલ ગૃહવિભાગ, આઇજીપી ગુજરાતને પોલીસ કમિશનરને મોકલી આપવા આદેશ કર્યો છે. નોંધનીય છે કે, કોર્ટમાં રજૂ થયેલ સાક્ષીના લિસ્ટમાં કોંગ્રેસના પૂર્વ પ્રદેશપ્રમુખ અર્જુન મોઢવાડિયાના પુત્ર પાર્થનો પણ ઉલ્લેખ કરવામાં આવ્યો હતો. પીએસઆઇ ચંદ્રકલાબા બી. જાડેજા મે 2016માં સેટેલાઇટ પોલીસ મથકના ડી સ્ટાફમાં પીએસઆઇ હતા ત્યારે તેમણે 8 મે, 2016ના રોજ અશાવરી ટાવર ખાતે દારૂની મહેફિલની રેડ કરી 25 આરોપીઓ સામે કેસ કર્યો હતો. આ કેસમાં આરોપીઓને જામીન પર વહેલા છોડવા અને મહિલા આરોપીઓની ધરપકડ ન કરવા કોન્સ્ટેબલ જિતેન્દ્રસિંહ મંડોરા મારફતે 4 લાખ રૂપિયાની માંગણી કરી હતી.
આ અંગે રેકોર્ડિંગ બહાર આવ્યા બાદ સેટેલાઇટ ઇન્સ્પેક્ટર યુ.સી. મસીએ જ પીએસઆઇ સામે ગુનો નોંધાવ્યો હતો. ત્યારબાદ આરોપીઓ સામે તપાસ ક્રાઇમ બ્રાન્ચનેઆ અંગે રેકોર્ડિંગ બહાર આવ્યા બાદ સેટેલાઇટ ઇન્સ્પેક્ટર યુ.સી. મસીએ જ પીએસઆઇ સામે ગુનો નોંધાવ્યો હતો. ત્યારબાદ આરોપીઓ સામે તપાસ ક્રાઇમ બ્રાન્ચને સોંપવામાં આવી હતી. પોલીસે તપાસ કરી ચાર્જશીટ સ્પે. એસીબી કોર્ટમાં કરતા કેસ ચાલવા પર આવ્યો હતો.
જેમાં આરોપીઓ તરફે એડવોકેટે પી.ડી.પંડ્યા અને કે.એ. શાહે દલીલ કરી હતી કે,આખોય કેસ સાબિત કરવામાં પોલીસ નિષ્ફળ નિવડી છે, આરોપી કોન્સ્ટેબલ સામે પ્રોસીક્યુશન કરવાની મંજૂરી આપવામાં આવી તેમાં કલમ 8 અને 12,15 હેઠળ પણ મંજૂરી આપવામાં આવી છે. ત્યારે કલમ 8 જોડવામાં આવે તો ખાનગી વ્યક્તિ જ્યારે સરકારી કર્મચારીને લાંચ આપે ત્યારે ખાનગી વ્યક્તિ વિરુદ્ધ કાર્યવાહી ચલાવી શકાય છે. પરંતુ આ કેસમાં ખાનગી વ્યક્તિ સામે ચાર્જશીટ જ કરવામાં આવી નથી. તો કલમ 8 કેવી રીતે લાગુ કરી શકાય. મહિલા પીએસઆઇ સામે કાર્યવાહી કરવા માટે જે મંજૂરી મેળવવામાં આવી છે તે કાયદા વિપરીત નથી, એક પણ સાક્ષીએ જુબાનીમાં લાંચની રકમ કોણે આપી અને કોને સ્વીકારી તે બાબત દર્શાવી નથી. આમ કેસ પુરવાર થતો નથી ત્યારે આરોપીઓને નિર્દોષ છોડી મૂકવા જોઇએ. એસપી દ્વારા આપવામાં આવેલ મંજૂરી બીનકાયદેસરની થઇ જાય છેઃ કોર્ટ
કોર્ટે ચુકાદામાં એવી નોંધ પણ મૂકી હતી કે, પોલીસ મેન્યુઅલ મુજબ ડેપ્યુટી ઇન્સ્પેક્ટર જનરલ ઓફ પોલીસ રેન્જના અધિકારી તેમની હાથ નીચે પોલીસ સબ ઇન્સ્પેક્ટરની નિમણૂક કરનાર અધિકારી છે તેથી પીએસઆઇને નોકરીમાંથી દૂર કરવાની સત્તા પણ ડીઆઇજી રેન્જ ધરાવે છે. ઉપરાંત, કાયદાની કલમ 19 મુજબ પીએસઆઇ સામે કાર્યવાહી કરવાની મંજૂરી પણ તેઓ જ આપી શકે છે. એસ.પી. કક્ષાના અધિકારી આ મંજૂરી આપી શકે નહીં. આ કેસમાં ડીએસપી આર.જી. પારઘીએ મંજૂરી આપી છે ત્યારે એસપી દ્વારા આપવામાં આવેલ મંજૂરી બીનકાયદેસરની થઇ જાય છે તેથી હાલના કેસને ન્યાયિક મંજૂરીનો બાધ નડે છે.
તપાસ કરનાર અધિકારીના બેદરકારીપૂર્વકના કૃત્યથી કેસ નિઃશંકપણે પુરાવાર કરવામાં ફરિયાદ પક્ષ સદંતર નિષ્ફળઃ કોર્ટતપાસ કનનાર અધિકારીએ આરોપી મહિલા પીએસઆઇનો અવાજ ખરાઇ કરાવવા માટે કોઇ પ્રયત્નો કર્યા નથી, તપાસ કરનાર દ્વારા દાખવેલ આ બેદરકારી ફરિયાદ પક્ષના કેસ માટે પ્રાણઘાતક સાબિત થયા છે. તેથી જે ઓડિયો ક્લીપ ઉપરથી ફરિયાદ પક્ષનો સમગ્ર કેસ શરૂ થયો છે તે ઓડિયો ક્લીપને નિષ્પક્ષ અને નિષ્ણાંતના પુરાવાથી સાબીત કરવાના કોઇ સંનિષ્ટ કે પ્રામાણિક પ્રયત્નો તપાસ કરનાર એજન્સી દ્વારા કરવામાં આવ્યા નથી. તપાસ કરનાર અધિકારીના બેદરકારીપૂર્વકના કૃત્યથી કેસ નિઃશંકપણે પુરવાર કરવામાં ફરિયાદ પક્ષ સદંતર નિષ્ફળ ગયો છે.
કયા સાક્ષીએ શું જુબાની આપી જેનો લાભ આરોપીઓને મળ્યો
સાક્ષી કુંતલ જયંતકુમાર શાહે કોર્ટમાં ઉલટ તપાસમાં જણાવ્યું હતું કે, આ કેસ સંદર્ભે મારે કોઇ પોલીસવાળાને મળવાનું થયું ન હતું. મારે કેસ સંદર્ભે કોઇની સાથે સેટીંગની કોઇ ચર્ચા થઇ ન હતી. મારી પાસે કેસ સંદર્ભે કોઇએ પૈસા માગ્યા ન હતા. સાક્ષી અશોકભાઇ રામસ્વરૂપ પંચારિયાએ કોર્ટમાં જણાવ્યું હતું કે, મેં બનાવ સંદર્ભે કોઇ પોલીસને ફોન કર્યો ન હતો અને હું કોઇને મળ્યો ન હતો. મેં કેસ સંદર્ભે કોઇમેં કેસ સંદર્ભે કોઇ પોલીસ સાથે વાત કરી જ ન હતી. મારી પાસે કેસ મામલે કોઇએ પૈસા માગ્યા નથી. સાક્ષી ભાવિનસિંહ અજિતસિંહ રાઠોડે કોર્ટ સમક્ષ જણાવ્યું હતું કે, આ મામલે કોઇનો ફોન આવ્યો હોય તો મને યાદ નથી, મેં કોઇ પોલીસ અધિકારીનો નંબર મેળવી આપ્યો હોય તે મને યાદ નથી. પાર્થ (અર્જુન મોઢવાડિયાનો દીકરો)એ મને કોઇ પૈસા આપવા બાબતે વાત કરી ન હતી. મેં કોઇ પોલીસ અધિકારીને રેકોર્ડિંગ મોકલ્યું હોય તે મને યાદ નથી. આરોપીઓને હું મળ્યો ન હોવાથી ઓળખી શકુ નહીં. મે મહિલા પીએસઆઇ સાથે થયેલ વાતચીતનું રેકોર્ડિંગ કોઇને આપ્યું હોય તેવું બન્યું નથી. રેકોર્ડિંગની સીડીમાં જે અવાજ છે તે મારો નથી. મેં પોલીસને સીડી આપી નથી. મારે વોઇસ સ્પેક્ટ્રોગ્રાફી મામલેગાંધીનગર કચેરી જવાનું થયું હોય તે મને યાદ નથી. પાર્થ મોઢવાડિયાની ધરપકડ અંગે મહિલા પીએસઆઇ સાથે કોઇ જ વાતચીત થઇ નથી. ફરિયાદી એમ.યુ. મસીએ જુબાનીમાં જણાવ્યું હતું કે, મારા મોબાઇલ પર 9 મે 2016ના રોજ વોટ્સ એપ પર એક મેસેજ આવ્યો હતો જેમાં પીએસઆઇએ મહિલા અને બાળકોને પોલીસ સ્ટેશન ન બોલાવવા 4 લાખ માગ્યા હોવાનો ઉલ્લેખ હતો. જે અવાજ પીએસઆઇ સીબી જાડેજાનો હતો. સીડીમાં જે અવાજ છે તે મહિલા પીએસઆઇ સીબી જાડેજાનો છે. વોટ્સ એપ મેસેજની કોઇ નોંધ પોલીસ મથકમાં કરી ન હતી અને અધિકારીઓને જાણ કરી હોય તે મને યાદ નથી. સીડીમાં મહિલા પીએસઆઇનો ભળતો અવાજ કોઇ કાઢ્યો હોય તેવું બની શકે છે. વોટ્સ એપ કરનાર વ્યક્તિ પાસે આ રેકોર્ડિંગ કેવી રીતે આવ્યું તેની તપાસ મેં કરી નથી. સાક્ષી અનુજ વિરેનભાઇ ઝવેરીએ જુબાનીમાં જણાવ્યું હતુકે, પૈસાની લેવડ દેવડ અમારી હાજરીમાં બની નથી. પૈસા કોણે આપેલા અને કોણે લીધા તે મને ખબર નથી. આ બનાવ સંદર્ભે કોઇને પૈસા આપવાનો પ્રસંગ બન્યો નથી. સાક્ષી ચિંતન નાગરદાસ શાહે કોર્ટમાં જુબાની દરમિયાન જણાવ્યું હતું કે, હું પોલીસ મથકમાં બેઠો હતો ત્યારે પૈસાનું સેટિંગ થઇ ગયું છે તેવું વાતચીતમાં સાંભળવા મળ્યું હતું અને કુંતલભાઇનું નામ સાંભળ્યું હતું. મારે પૈસા આપવાનો પ્રસંગ બન્યો ન હતો.
